Адамзат шеруін жіті зерттеп, әдеби жәдігерлерді құныға зерделеп, музыка мен философияны жан-жақты байыптаған Друкер – арғы-бергі тарихта ұтысқа шығарған тағлымды шешімдер мен сыннан өткен басқару жорасын жаңа заман талаптарына бейімдей алған бірден-бір данышпан. Сондықтан оның әрбір кеңесі салмақты, әрбір лепесі мағналы.
Еуропа төрінде өткен ауқымды бір лекциясынан үзінді (Аударма)
- Өзіңізді басқарып үйреніңіз (The First Important Thing: Manage Yourself)
Менің қолымнан шыққан дүниелерді қоса есептегенде, барлық менеджмент кітаптары, көбіне көп адамдарды басқару туралы жазады. Ал шындап келгенде, өзін басқара алмайтын адам басқаға да жөн сілтей алмайды. Басшы, менеджер болсаңыз, қолыңыздағы ең үлкен ресурс – өзіңіз екенін ұмытпаңыз. Өзіңіз өспесеңіз, ғұзырыңыздағы құрылым да дамып, өркендемейді. Есіңізде болсын, елдің немесе компанияның болашағы – даму деген сөзге кеп тіреледі. Ал даму дәргейіңіздегі көп нәрсенің ішіндегі бір нәрсені – Өзіңізді қаншалық ұтымды пайдаланатыныңызға байланысты.
Мен салқар карьерамда талай компанияның бизнес кешуін зерттедім. Сондағы байқағаным, асқақтап тұрған асқаралы бизнестердің ортақолды фирмалардан айырымы – алдыңғыларды өздерінің басымдықтарын жақсы білетін, өздерін тәртіпке келтіре алатын жетелі жандар басқарған. Бірақ басымдықты түстеп тану оңай емес. Арнайы күш жұмсап, қайрат қылмайынша, адам ұғлы қай салада топ жара алатынын дөп басып айта алмайды.